ថ្ងៃទី០៦ ខែមីនា ឆ្នាំ២០២៥ សមាគមសហគ្រិនវ័យក្មេងកម្ពុជា បានបើកកិច្ចប្រជុំប្រឹក្សាពិគ្រោះយោបល់ជាមួយស្ថាប័នដៃគូ លើផែនការយុទ្ធសាស្ត្រឆ្នាំ ២០៣០ របស់សមាគម ស្ថិតនៅសណ្ឋាគារ អូឡាំព្យា ស៊ីធី រាជធានីភ្នំពេញ។ កិច្ចប្រជុំនេះមានការអញ្ជើញចូលរួមពីថ្នាក់ដឹកនាំ និងអ្នកជំនាញមកពីវិស័យសំខាន់ៗ រួមមានវិស័យហិរញ្ញវត្ថុ វិស័យអប់រំ វិស័យឧស្សាហកម្ម និងវិស័យផ្សេងៗទៀត ព្រមទាំងភ្នាក់ងារពាក់ព័ន្ធរបស់រាជរដ្ឋាភិបាលផងដែរ។ កិច្ចប្រជុំនេះរៀបចំឡើងដើម្បីធ្វើបច្ចុប្បន្នភាពផែនការ និងគម្រោងនានាក្នុងឆ្នាំ២០២៥ ប្រមូលធាតុចូលសំខាន់ៗពីស្ថាប័នដៃគូពាក់ព័ន្ធទាំងអស់ និងពិនិត្យមើល ព្រមទាំងកែសម្រួលទិសដៅយុទ្ធសាស្ត្រសមាគមឆ្នាំ ២០២៦-២០៣០ ដោយផ្អែកតាមក្របខ័ណ្ឌអាស៊ាន និងនិន្នាការសកល ក៏ដូចជាផែនការយុទ្ធសាស្ត្ររបស់រាជរដ្ឋាភិបាលកម្ពុជា។

ការប្រមូលធាតុចូលពីស្ថាប័នដៃគូពាក់ព័ន្ធ គឺពិតជាមានសារៈសំខាន់ខ្លាំងណាស់ ដើម្បីអាចដាក់ចេញនូវផែនការយុទ្ធសាស្ត្រ ឆ្នាំ ២០៣០ របស់សមាគម និងដែលឆ្លុះបញ្ចាំងពីការឆ្លើយតបត្រឹមត្រូវ ជាក់លាក់ ចំគោលដៅ ដើម្បីដោះស្រាយបញ្ហាប្រឈមរបស់សហគ្រិនកម្ពុជា ឈានទៅរកការទទួលបាននូវប្រសិទ្ធភាពខ្ពស់ពីការអនុវត្តផែនការសកម្មភាពជាក់ស្ដែងនៅក្នុងឆ្នាំបន្តបន្ទាប់។ ការប្រមូលផ្តុំមតិយោបល់ពីគ្រប់ភាគី រួមមានគ្រឹះស្ថានហិរញ្ញវត្ថុ សមាគមធុរកិច្ច អង្គការអន្តរជាតិ ដៃគូអភិវឌ្ឍន៍ ដៃគូឧបត្ថម្ភ គ្រឹះស្ថានអប់រំ និងស្ថាប័នរដ្ឋសំខាន់ៗ បានធ្វើឱ្យការជជែកពិភាក្សាប្រពឹត្តទៅដោយសកម្ម និងផលិតភាពខ្ពស់ ពោលគឺធ្វើយ៉ាងណាដើម្បីសម្រេចបាននូវគោលដៅរួមមួយ គឺការជំរុញកម្ពុជាឱ្យមានការអភិវឌ្ឍវិស័យសេដ្ឋកិច្ចរីកចម្រើនយ៉ាងលឿនរហ័ស និងក្លាយទៅជាប្រទេសមានប្រាក់ចំណូលមធ្យមកម្រិតខ្ពស់ នៅត្រឹមឆ្នាំ ២០៣០។

នៅក្នុងកិច្ចពិភាក្សានេះផងដែរ សមាគមបានលើកឡើងនូវសំណួរសំខាន់ៗជាច្រើន ជូនដល់ស្ថាប័នដៃគូដែលបានចូលរួម ដោយក្នុងនោះមានដូចជា ថាតើស្ថាប័នដៃគូទាំងអស់មានចក្ខុវិស័យ និងទស្សនៈ មើលឃើញពីដំណើរវិវត្តន៍របស់សហគ្រាសធុនមីក្រូ តូច និងមធ្យមនៅកម្ពុជា នឹងប្រែប្រួលទៅជាយ៉ាងណា ក្នុងរយៈពេល ៥ ឆ្នាំទៅខាងមុខ ដោយពិនិត្យមើលលើការអភិវឌ្ឍវិស័យបច្ចេកវិទ្យា នវានុវត្តន៍ បរិវត្តកម្មឌីជីថល និងភាពប្រកួតប្រជែងសកល ហើយថាតើសហគ្រាសទាំងអស់នោះ នឹងត្រូវត្រៀមខ្លួនបែបណាដើម្បីអភិវឌ្ឍខ្លួនឱ្យបានទាន់បម្រែបម្រួលនៅក្នុងប្រព័ន្ធអេកូសេដ្ឋកិច្ចក្នុងស្រុក និងអន្តរជាតិដ៏ស្មុគស្មាញនេះ។

សមាគមសហគ្រិនវ័យក្មេងកម្ពុជាបានប្រមូលនូវធាតុចូលចម្បងៗ ចងក្រងដើម្បីយកទៅវិភាគសិក្សាលម្អិតបន្ថែមដោយគណៈកម្មការទទួលបន្ទុក ដើម្បីដាក់ចេញទិសដៅយុទ្ធសាស្ត្រ ២០២៦-២០៣០ និងផែនការសកម្មភាពដែលឆ្លើយតបបានត្រឹមត្រូវតាមតម្រូវការរបស់សហគ្រិនកម្ពុជា និងសមាជិកសមាគម ស្របតាមការវិវត្តស្ថានភាពជាក់ស្ដែងរបស់វិស័យធុរកិច្ចនៅកម្ពុជា។

នាថ្ងៃទី០៦ ខែមីនា ឆ្នាំ២០២៥ សមាគមសហគ្រិនវ័យក្មេងកម្ពុជា បានរៀបចំ “ជំនួបសហគ្រិនវ័យក្មេង​ លើកទី១ ២០២៥” ដោយមានការអញ្ជើញចូលរួមពីគណៈធិបតី ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា លោក គី សុខគីម នាយកប្រតិបត្តិ មូលនិធិអភិវឌ្ឍន៍ជំនាញ  កញ្ញា ផាន់ សុនីតា ប្រធានគណៈកម្មការប្រតិបត្តិនៃសមាគមមិត្តយើង និងអ្នកស្រី ទេព វឌ្ឍនា មន្ត្រីថ្នាក់ជាតិប្រចាំគម្រោងការងារសមរម្យសម្រាប់យុវជនដំណាក់កាលទី៣ នៃអង្គការអន្តរជាតិខាងការងារ (ILO) ព្រមទាំងម្ចាស់អាជីវកម្មមកពីគ្រប់វិស័យប្រមាណជាជាង ១២០ នាក់។

ជំនួបសហគ្រិនវ័យក្មេង​ លើកទី១ ប្រចាំឆ្នាំ២០២៥ នេះបានផ្ដោតសំខាន់ទៅលើកិច្ចសហការជាមួយស្ថាប័នដៃគូសំខាន់ៗរួមមាន មូលនិធិអភិវឌ្ឍន៍ជំនាញ និងការចុះអនុស្សរណៈនៃការយោគយល់គ្នាជាមួយសមាគមមិត្តយើង។ បន្ថែមលើនេះ ម្ចាស់អាជីវកម្មក៏បានសិក្សាស្វែងយល់ពីនិន្នាការសកលដែលនឹងមានឥទ្ធិពលលើកិច្ចការអភិវឌ្ឍន៍វិស័យសហគ្រាសធុនមីក្រូ តូច និងមធ្យមជារួម​ និងបញ្ហាប្រឈមរបស់ម្ចាស់សហគ្រាសនៅកម្ពុជា ដោយផ្អែកតាមការស្ទង់មតិ ដើម្បីជាមូលដ្ឋានក្នុងការដាក់ចេញផែនការយុទ្ធសាស្ត្រសមាគម ២០៣០ ពោលគឺដើម្បីឆ្លើយតបតាមតម្រូវការជាក់ស្ដែងនៃការវិវត្តស្ថានភាពសង្គម និងសេដ្ឋកិច្ចនាពេលបច្ចុប្បន្ន។

ភាពជាដៃគូរវាងសមាគម និងមូលនិធិអភិវឌ្ឍន៍ជំនាញ នឹងបើកឱកាសឱ្យសមាជិកសមាគមអាចស្វែងយល់ពីគុណប្រយោជន៍នៃការអភិវឌ្ឍជំនាញ និងការអភិវឌ្ឍខ្លួន និងស្ថាប័នជាប្រចាំសម្រាប់សហគ្រិន និងបុគ្គលិកក្នុងសហគ្រាសរបស់ខ្លួន។ ម្ចាស់អាជីវកម្មក៏បានទទួលនូវព័ត៌មានថ្មីៗទាក់ទងនឹងកម្មវិធីគាំទ្រផ្សេងៗពាក់ព័ន្ធក្នុងប្រព័ន្ធអេកូជំនាញ និងសហគ្រិនភាពទាំងក្នុង និងក្រៅប្រទេស។

ការចុះអនុស្សរណៈនៃការយោគយល់គ្នារវាងសមាគមសហគ្រិនវ័យក្មេងកម្ពុជា និងសមាគមមិត្តយើង ក៏មានគោលបំណងបង្កើតនូវក្របខណ្ឌនៃកិច្ចសហប្រតិបត្តិការ ក្នុងការផ្តល់ជំនាញ (Skill Training) បន្ថែមជំនាញ (Upskilling) ផ្លាស់ប្តូរជំនាញ (Re-skilling) ការបណ្តុះបណ្តាលចល័ត (Mobile Training) រង្វាយតម្លៃសមត្ថភាព (Recognition Prior Learning & Recognition Current Competency) និងបង្កើនផលិតភាពការងារ (Productivity Enhancement) ដើម្បីជំរុញ និងលើកស្ទួយភាពមានការងារធ្វើ មុខរបរសមរម្យ ស្ថេរភាពចំណូល និងសមត្ថភាពប្រកួតប្រជែងនៃប្រជាជនកម្ពុជា តាមរយៈការបណ្តុះបណ្តាលជំនាញបច្ចេកទេស និងជំនាញទន់ ក្រោមទម្រង់នៃការបណ្តុះបណ្តាលផ្សេងៗ រួមមាន វគ្គវែង វគ្គខ្លី សិក្ខាសាលា ការចុះហាត់ការ/កម្មសិក្សា និងកម្មវិធីផ្លាស់ប្តូរនានា។

ថ្ងៃទី ១៨ ខែកុម្ភៈ ឆ្នាំ ២០២៥ ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា បានជួបពិភាក្សាជាមួយ Invest Selangor Berhad ដែលជាទីភ្នាក់ងារជំរុញការវិនិយោគនៅទីក្រុង Selangor ប្រទេសម៉ាឡេស៊ី។ កិច្ចពិភាក្សាបានផ្តោតលើកម្មវិធី Selangor International Business Summit (SIBS)​ ដែលគ្រោងធ្វើឡើងនៅថ្ងៃទី ៨ ដល់ថ្ងៃទី ៩ ខែតុលា ឆ្នាំ២០២៥ ស្ថិតនៅមជ្ឈមណ្ឌលសន្និបាត Kuala Lumpur។ SIBS គឺជាវេទិកាដ៏សំខាន់មួយក្នុងការគាំទ្រអាជីវកម្មក្នុងស្រុក និងអន្តរជាតិ ដើម្បីស្វែងរកឱកាសទីផ្សារ និងវិនិយោគផ្សេងៗនៅក្នុងតំបន់អាស៊ាន។ កិច្ចប្រជុំនេះ ក៏បានបើកផ្លូវសម្រាប់កិច្ចសហប្រតិបត្តិការជាបន្តបន្ទាប់ទៀតនាពេលអនាគត។