កម្មវិធីនេះមានវត្តមានអញ្ជើញចូលរួមដ៏ខ្ពង់ខ្ពស់ពី ឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ដែលផ្តល់កិតិយសចូលរួម ជាពិសេស ផ្តល់បទបាឋកថា ពីសៀវភៅមគ្គុទេសវិនិយោគ និងមានវត្តមានចូលរួមពីថ្នាក់ដឹកនាំ រួមទាំងសមាជិកសមាជិការបស់សមាគមប្រមាណ២០០នាក់ បានចូលរួម និងអបអរសាទរនៅក្នុងកម្មវិធី។

លោក ស៊ាង សុបញ្ញា ប្រធានសមាគមសហគ្រិនវ័យក្មេងកម្ពុជាមានប្រសាសន៍ថានេះជាលើកទី២ ក្នុងឆ្នាំ២០២២ ដែលសមាគមសហគ្រិនវ័យក្មេងកម្ពុជា បានរៀបចំកិច្ចជំនួបសមាជិកដែលជាម្ចាស់អាជីវកម្ម (CEO GATHERING) ក្នុងចំណោមសមាជិក សមាជិកាសមាគម នៅទូទាំងប្រទេស ដើម្បីផ្តល់ឳកាសឲ្យសមាជិក បានទទួលនូវព័ត៌មានសំខាន់ៗ ច្បាប់ គោលនយោបាយសម្រាប់សហគ្រិន និងបង្ហាញពីវឌ្ឍនភាពសមាគម និងសមិទ្ធផលសម្រេចបាន សំខាន់ៗរបស់សមាគមក្នុងពេលកន្លងមក និងលើកទិសដៅសម្រាប់ត្រីមាសបន្ទាប់។ ជាមួយគ្នានេះ កម្មវិធីជំនួបម្ចាស់អាជីវកម្ម ក៏ធ្វើឡើងដើម្បីផ្តល់ឳកាស កសាងបណ្តាញអាជីវកម្មក្នុងចំណោមសមាជិក ជាពិសេសការស្តាប់ពីបញ្ហាប្រឈមក្នុងការធ្វើអាជីវកម្ម និងពិភាក្សារកដំណោះស្រាយសម្រាប់ជួយទៅដល់សមាជិកសមាគមផងដែរ។

កម្មវិធីគឺបានចែករំលែកព័ត៌មានអាជីវកម្មសំខាន់ៗ “មគ្គុទេសក៍វិនិយោគខេត្ត” និងបានអបអរសាទរទិវាសមាជិកភាពសម្រាប់ការចូលរួមសមាជិករបស់ YEAC ជាពិសេសការធ្វើបច្ចុប្បន្នភាពអំពីវឌ្ឍនភាព និងផែនការរបស់ YEAC ដល់សមាជិក រួមជាមួយការសម្ពោធដាក់ឲ្យដំណើរការគម្រោង “Clinic for MSMEs Digital Acceleration for New Growth in Digital Economy” និងការបង្កើតសហប្រតិបត្តិការជាដៃគូជាមួយក្រសួង និងស្ថាប័នពាក់ព័ន្ធ តាមរយៈសមាគមសហគ្រិនវ័យក្មេងកម្ពុជា។